BUTUAN CITY – Angayan matud pang sundugon sa mga Filipino ang kapursigido sa mga Israelis nga mabuhi taliwa sa ka-limitado sa ilang resources.
Kini ang gipadayag sa usa sa mga business delegates ni Pangulong Rodrigo Duterte nga si Ryan Anthony Culima human nasaksihan ang grabeng paglambo sa maong estado taliwa sa kagamay lang sa ilang mga resources.
Aminado si Culima nga angayang tun-an ang kalidad sa mga Hudiyo sa Israel tungod sa ilang ka-survivor taliwa sa kadisyerto pa sa maong lugar apan ila gihapong napalambo paglabay sa pipila ka dekada.
Kamatu-uran niini, usa sila sa mga nasud nga nanguna sa natad sa teknolohiya gawas sa kalig-on usab sa ilang kasundaluhan.
Lakip sa angayan matud pang tun-an sa Pilipinas sa Israel mao ang agrikultura tungod kay taliwa sa kadisyerto niini og kakulang sa tubig, ila gihapon kining napalambo.
Kamatu-uran niini, napruybahan sa maong nasud ang ilang kamaayo sa natad sa agrikultura tungod kay usa sila sa pinakadakong vegetable og fruit producing country sa tunga-tungang sidlakan. (Beth Ruiz)
