BUTUAN CITY – Wala pa’y mahatag nga target date ang nasudnong kagamhanan kung kanus-a makab-ot sa Pilipinas ang herd immunity bisan og sunod-sunod na ang pag-abot sa mga COVID-19 vaccines gikan sa nagkada-iyang manufacturers.
Sa eksklusibong pakighinabi sa Bombo Radyo Butuan, gipadayag ni Presidential Communications Operations Office kon PCOO Secretary Martin Andanar nga as of kagahapong adlawa, mi-abot na sa 38-milyunes doses sa mga bakuna ang nangabot sa nasud apan kulang pa sa gikinahanglang 140-million doses alang sa gitagan-ang 70 ngadto sa 80-porsiento sa kinatibuk-ang populasyon sa nasud.
Gawas sa kulang pa nga vaccine doses, anaa pa usab ang mga bag-ong variants nga mao karo’y naghatag og hulga sa padayong pagsaka sa mga kaso sa COVID-19 sa bisan asang bahin sa nasud ilabina sa Delta variant ug sa gitun-an pa karong Lambda variant nga mugna sa padayong pag-mutate sa coronavirus.
Tungod niini, tambag sa Caraganong opisyal ngadto sa tanan nga padayong tamdan ang mga minimum health protocols aron malikayan ang mas makatakod nga Delta variant nga una nang mi-igo sa India ug Indonesia.
Gidugang pa sa kalihim nga bisan og apil kita sa mga developing countries, apan dalaygon ang paningkamot sa gobyerno paghimo og mga lakang aron lang mabatukan ang makamatay nga coronavirus.
Base kini sa assessment ni World Health Organization kon WHO Representative to the Phiippines Rabindra Abeyasinghe. Tambag niini nga dili gihapon mukumpyansa ug kinahanglang musunod kanunay sa ipagawas nga advisories sa mga local government units ilabina sa mga barangay officials.
Ang hulgang hatud sa COVID-19, mao amtud pa ang parte lang sa legasiyang gitutukan sa nahabiling mga buwan sa pagpangatungdanan ni Pangulong Rodrigo Duterte nga maoy magsilbing legasiya sa iyang administrasyon.
