BUTUAN CITY – Gipaneguro sa Malacañang nga padayon ang pagpangita sa kagamhanan kang kanhi kongresistang si Zaldy Co taliwala sa pag-archive sa Sandiganbayan sa graft case batok kaniya tungod sa kapakyas sa pag-aresto kaniya sulod sa kapin unom ka bulan.
Sigon ni Palace Press Officer Undersecretary Claire Castro nga wala pasagdi sa mga awtoridad ang ilang katungdanan sa pagpangita kang Co, kinsa nag-atubang og mga kasong graft ug malversation may kalabotan sa giingong maanomalyang road dike project sa Naujan, Oriental Mindoro.
Gihatagan usab og gibug-aton ni Castro nga ang pag-archive sa kaso usa lamang ka procedural nga lakang ug wala magpasabot nga gibasura na ang mga kasong gipasaka batok kang Co.
Sumala pa niini, temporaryo lamang nga gikuha ang kaso sa listahan sa mga aktibong gidungog sa korte ug daling ibalik kini sa regular nga proseso sa higayon nga madakpan na ang kanhi mambabatas.
Gipasabot pa ni Castro nga mohunong usab ang pagdagan sa prescriptive period samtang naka-archive ang kaso, hinungdan nga dili mawala ang tulubagon ni Co bisan pa og madugay ang iyang pagpabilin sa gawas sa nasod.
