BUTUAN CITY – Mas milapad pa ang international career sa aktres nga si Lovi Poe human makumpirmang lakip siya sa bag-ong thriller film nga ”Ignition” kauban ang Game of Thrones (GOT) star actress Maisie Williams.
Sumala sa taho sa Variety, ang nasangpit nga pelikula usa ka “high-concept thriller” nga gidirek ni James Erskine.
Kauban usab sa cast ang aktor nga si Rory Kinnear.
Sa estorya sa Ignition, hawiran ni Williams ang papel isip si Sylvie Johnson, usa ka babaye nga kalit lang nasulod sa usa ka delikadong sitwasyon human makadawat og tawag nga dunay bomba sa iyang sakyanan.
Mapugod siyang sundon ang mga mandu sa usa ka wala nagpailang tawo samtang nagbaktas padulong sa Royal Albert Hall.
Gamiton sa pelikula ang “live cinema” filming technique diin gikuha ang mga eksena sa tinood nga lokasyon gamit ang multi-camera system aron makuha ang mas katoohan ug intense nga performance sa mga artista.
Sigon ni Erskine, tumong sa pelikula nga ipabati sa manan-aw ang tensyon ug pressure nga nasinatian sa nag-unang karakter sa real time.
Sa iyang social media post, gibutyag ni Lovi Poe nga malipayon siya sa proyekto ug gikalipay ang pagpaila sa pelikula sa Cannes Film Festival karung buwana, Mayo.
