BUTUAN CITY – Gipalit na nila American businessman Josh Kushner ug kanhi Disney executive Bob Iger ang Los Angeles Lakers sa kantidad nga $12.5 bilyon kon bugti sa -pisos.
Tungod niini, kuhaon nila Kushner ug Iger ang controlling interest o nag-unang bahin sa pagpanag-iya sa Lakers gikan kang Mark Walter nga maoy mipalit sa majority stake sa team gikan sa pamilyang Buss sa kantidad nga $10 bilyon niadtong Oktubre 2025.
Sigon nila Kushner ug Iger, dakong dungog alang kanila nga mahimong bag-ong mangulo sa usa sa labing iladong basketball teams sa kalibotan dayong saad nga ipadayon nila ang kalampusan sa Lakers ug palig-onon pa ang relasyon sa team uban sa mga fans niini ug sa komunidad sa Los Angeles.
Samtang gibutyag ni Walter nga ang pagpanag-iya sa Lakers usa sa pinakadakong dungog sa iyang kinabuhi, ug nagtuo siya nga daghan pa og mga kalampusan ang mu-abot alang sa team.
Sa wala pa ang pagpalit sa Lakers, gikataho nga apil sila Kushner ug Iger sa mga grupo nga interesado nga makakuha og NBA expansion team sa Las Vegas.
Ang Lakers, nga natukod niadtong 1947, nakaduwa na sa 32 ka NBA Finals ug nahimong kampeon 17 ka higayon. Ikaduha kini sa Boston Celtics nga adunay 18 ka NBA titles.
