BUTUAN CITY – Hingpit nang gitangtang sa nasudnong kagamhanan sa Republic of Ghana ang ilang tulo ka semanang lockdown nga nagsugod niadtong Marso 30 ug gitangtang niadtong Abril 19.
Kini ang gisaysay sa Butuanong si Oliver Terante sa eksklusibong pakighinabi sa Bombo Radyo Butuan direkta gikan sa maong nasud.
Apan gibutyag niining dili gihapon sila hingpit nga gawasnon tungod kay gi-adaptar gihapon nila ang mga health protocols sama sa social distancing, pagbawal sa pagpahigayon og party, wala’y himuong paglubong, klase, simba og uban pang mga panagtapok sa mga tawo.
Samtang sirado gihapon hangtud karon ang ilang mga borders rason nga wala’y mga eroplanong makasulod-gawas sa maong nasud. Bisan sa ilang opisina, gitunga ang shifting sa ilang mga empleyado kondiin duna’y mu-report sa ilang opisina ug duna usa’y mag-work from home nga mabali kada-semana.
Tumong niini nga makunhran ang mga tawong mag-duty ilabina nga kada-building, limitado lang kutob sa 25 ka mga tawo ang anaa sa sulod.
Ang ayudang gihatag sa kagamhanan sa Ghana ngadto sa ilang mga kabus mao ang tulo ka buwang libreng bayad sa kuryente, tubig ug gawas pa sa pagkaon samtang ang mga pribadong kompanya, nag-donate usab alang sa katawhang kabus.
