BUTUAN CITY – Usa ka tag-iya og café sa British Columbia ang nagsaulog sa iyang ika-80 ka tuig nga adlaw’ng natawhan pinaagi sa pagluto ug pag-assemble og dako kaayong carrot cake nga nagsukod og 17 ka tiil by 17 ka tiil.
Si Ted Martindale, tag-iya sa Granville’s Coffee sa Quesnel, nakigtambayayong sa daghang lokal nga panaderya aron ma-assemble ang iyang birthday cake, nga naglangkob og sobra sa 1,760 ka libra nga carrots, 700 ka libra nga mantikilya, liboan ka itlog, ug hapit 2,000 ka libra nga icing.
Sigon si Martindale, kapin sa usa ka bulan ang ilang gigahin aron maluto ang 430 ka indibidwal nga cake nga gihimong usa ka dako nga cake. Ang cake gisilbi sa birthday party ni Martindale sa lokal nga senior’s center.
Ang kasamtangang Guinness World Records alang sa pinakadako nga carrot cake gihuptan sa usa ka panaderya sa Surrey, British Columbia, nga nakahimo og 4,574 ka libra nga cake niadtong 2016.
Dugang ni Martindale, ang iyang cake mitimbang og mga 6,044 ka libra, apan kinahanglan pa kining susihon sa Guinness World Records aron opisyal nga ma-angkon ang rekord.
