BUTUAN CITY – Gipaneguro sa House prosecution panel nga wala maapektuhan ang ilang kredibilidad luyo sa affidavit ug testimonya sa 18 ka kanhe marines nga gitawag niinig kargador kalabot sa impeachment case batok kang Vice President Sara Duterte.
Sigon ni Batangas Rep. Gerville “Jinky Bitrics” Luistro, daghang dili magkatakdo sa mga pamahayag sa mga kanhi Marino nga klarong nakita sa publiko.
Nagpabilin matud pa nga matinud-anon sa integridad ug serbisyo publiko ang 11 ka House prosecutors.
Sumala usab ni Kabataan Party-list Rep. Renee Co nga mas gikuwestiyon sa publiko ang kredibilidad sa mga testigo kaysa sa mga prosecutor.
Gipamugos niya nga magpadayon ang panel sa pagtuman sa proseso sa pagpanubag.
Gihagit usab ni Rep. Co ang mga tunghaan, law schools, komunidad, ug civil society groups nga maghimo og mga watch party ug panag-istoryahanay kalabot sa impeachment trial ni Vice President Sara Duterte.
Sigon ni Co, mahinungdanon nga masubaybayan ug masabtan sa publiko ang proseso sa pagtaral pinaagi sa mga livestream ug pampublikong diskusyon, imbis nga magsalig lamang sa mga report ug interpretasyon sa uban.
Gibarugan ni Co nga ang hapsay nga pagtaral ug pagpanubag sa mga opisyal mahinungdanon alang sa kaugmaon sa kabatan-onan diin padayon nilang iasdang ang halapad nga partisipasyon sa publiko ug ang dinalian nga pagpadayon sa impeachment trial.
