BUTUAN CITY – Gi-disbar sa Supreme Court ang bag-ong tudlo nga Presidential Adviser for Poverty Alleviation nga si Lorenzo “Larry” Gadon tungod sa iyang mapasipad-ong komento batuk sa usa journalist.
Sigon sa SC Public Information Office, ang SC en banc mibotar nga 15-0 pabor sa pag-disbar kang Gadon tungod sa nag-viral niyang video clip diin balik-balik niyang gitunglo ug gipasipad-an ang journalist nga si Raissa Robles.
Plano karon ni Gadon nga mag-file og motion for reconsideration sa rason nga harsh ra kaayo ang penalidad.
Gipasabot niini nga ang iya matud pang gihimo ngadto sa reporter, mugna sa wala’y hunong nga pagpakaylap niini og mga bakak batuk kang Pangulong Ferdinand ‘Bongbong’ Marcos Jr. atol sa campaign period kansa nagtumong aron ilaron matud pa ang publiko kalabot sa mga isyu nga nagtinguha pagguba sa kandidatura kaniadto sa pangulo.
Na-disbar si Gadon duha ka adlaw human gi-anunsyo sa Malakanyang ang pagtudlo kaniya isip Presidential Adviser for Poverty Alleviation.
Sigon sa Presidential Communications Office, ang katudluan ni Gadon sa maong posisyon nagsalamin sa kakomitido sa kagamhanan nga tubagon ang usa sa pinakadakong mga hagit nga gi-atubang sa atong nasud.
