BUTUAN CITY – Misaka na sa 66 ka kaso sa Scombroid Fish Poisoning ang natala sa Iloilo Provincial Health Office sugod niadtong Abril 6 hangtod Abril 10, 2026, nga sumala pa tungod sa pagkaon og isdang tulingan.
Ang scombroid fish poisoning usa ka klase sa sakit nga makuha gikan sa pagkaon o foodborne illness nga resulta sa pagkaon og kontaminadong isda nga adunay taas nga lebel sa histamine, kasagaran tungod sa dili sakto nga pag-refrigerate.
Sa pakighinabi sa Bombo Radyo kang Dr. Maria Socorro Quiñon, head sa Iloilo Provincial Health Office, gibutyag niini nga sa kinatibuk-ang ihap, tulo na lang ang nagpabilin sa ospital.
Ang mga naka-experience og scombroid fish poisoning nagpakita og mga simtomas sama sa rashes, paghoot sa dughan, kalisod sa pagginhawa, pagkalipong, sakit sa ulo, pagpamula sa aping, sakit sa tiyan, pagsuka, pagpamula sa mata, diarrhea, ug hilanat.
Gipahimangnoan sa ahensiya ang publiko nga magbantay sa pagpalit og isda, ug gitambagan ang mga namaligya nga dili na ibaligya ang isda kung dili na kini presko.
