Kasagingan nga gihimung drug den sa Butuan City, na-raid sa kapulisan
BUTUAN CITY – Gi-andam na ang kasong ipasaka batuk sa usa ka 19-anyos nga lalaking nasignit sa buybust operation kaganina mga alas 4:00 sa hapon sa may Purok Silangan, Barangay Agusan Pequeño ning siyudad sa Butuan.
Nasayrang buntag pa gihupo-hupo-an sa mga personahe sa Butuan City Police Station-2 ang suyupanan sa mga suspek nga anaa sa kasagingan.
Sa maong operasyon, nasikop si Melgin Herosa Gubaton nga taga P-7, Barangay Bading apan naka-ikyas ang iyang duha ka kaubanan samtang nakumpiska usab ang 55 gramos sa gitoohang shabu nga dunay market value nga 649-mil pesos, apil na ang mga drug paraphernalias.
Sa pakighinabi sa nadakpang suspek nga si Gubaton, panagsa ra matud pa siya magpuyohot sa ginadiling drugas diin sa ginganlan ug Warren Pandiin siya magkuhaan ug niadtung higayuna ihatag unta niya kini sa ginganlan ug Luis Plaza.
Gibasolan usab niini ang iyang wala nga binuhatan ug nanghinaot nga mahatagan ug kahigayunan nga makagawas ug magbag-o sa kinabuhi.
Gikumpirma usab ni P/Sr. Insp. Roland Orculio, sa BCPS-2 nga wala sa ilang listahan ang nadakpang suspetsado diin nakasibat ang target. Ipadayun matud pa nila ang pagsurvillance sa mga naka-eskapo samtang e-validate ang rebelasyun sa dinakpan.
Gibutyag usab niini nga natud-an nila ang lugar giin ginahimu ang operasyon sa mga supetsado pinaagi sa ilang asset.
Gidugang pa niini nga tungod sa kadako sa nakuhang shabu sa suspek, dili kini mahatagan ug piyansa.
Samtang sa kabahinan ni Barangay Kapitan Gary Abuso, aminado kini nga layu pa sa tinood nga makadeklara kini ug drug free sa Barangay Agusan Pequeño. Kini tungod sa daghan pa gihapon ang nalambigit sa ginadiling drugas.
Tungod niini, nanghinaot ang opisyal nga ibutang sa kasing-kasing sa mga otoridad ang pagpatuman sa Oplan Tokhang dungan sa pag-awhag sa tanang barangay officials nga pahugtan pa ang kampanya kontra sa illegal drugs.
