BUTUAN CITY – Nagpatabang na si kanhi Anak Kalusugan partylist Rep Michael Defensor kang Ombudsman Jesus Crispin Remulla aron pangitaon si kanhi Marine Sergeant Orly Guteza, usa ka whistleblower sa anunmalusong mga flood control projects.
Sigon ni Defensor, wala na’y kontak si Guteza sa iyang pamilya sukad pa ning miaging tuig, mao nga nabalaka na sila. Si Guteza mao ang usa sa mga testigo nga naghatag og affidavit bahin sa gika-ingong pagdala niya og mga maleta nga puno sa kwarta ngadto kang kanhi House Speaker Martin Romualdez.
Dugang ni Defensor, gigamit sa Ombudsman ang mga affidavit ni Guteza ug sa 18 ka kanhing Marines sa kaso nga gi-andam batok kang Romualdez ug kang kanhi Congressman Zaldy Co.
Mihangyo si Defensor kang Remulla nga tabangan sa pagpangita ug pagpanalipod kang Guteza ug sa iyang pamilya.
Gipadayag usab ni Defensor ang usa ka recording sa panag-istorya ni Guteza ug sa iyang asawa diin gipadayag ni Guteza nga nahadlok siya alang sa iyang kinabuhi dayong butyag nga gipapirma siya og laing affidavit aron bakwion ang iyang unang mga pamahayag.
Mahitungod sa kaso nga nalambigit ang iyang asawa ug anak sa raid sa National Bureau of Investigation sa Bleu Hotel, gibutyag ni Defensor nga dili siya mokomentaryo niini kay legal na nga asunto ug gipatugyan na nila kini sa ilang mga abogado.
