BUTUAN CITY – Nagtinabangay ang Agusan del Sur Provincial Sports and Development Services Office og Provincial Health Office sa Medical and Dental Mission para sa mga atletang pambato sa Caraga Region sa Palarong Pambansa 2026 karung umaabot nga buwan sa Mayo.
Tumong sa buhatan nga maseguro ang kahimsog sa mga atleta.
Sa gihimong misyong panglawas, gihatag ang libreng vital signs monitoring, physical assessment, medical consultation, mental health assessment, libreng ibot sa ngipin, ug nanghatag usa giresetang tambal.
Gisaad sa buhatan nga magpadayon ang pagtinabangay sa Provincial Sports ug Health Office para maatiman ang panglawas sa mga atleta sa panghinaot nga mahatag nila ang pinakamaayong performance sa natad sa sports.
Nakatakda ang Palarong Pambansa 2026 sa May 24 – 31 nga himoon sa D.O. Plaza Memorial Sports Complex sa Prosperidad, Agusan del Sur.
Kini na ang ika-66 nga edisyon sa Palarong Pambansa.
