BUTUAN CITY- Mingsaka na sa dul-an tunga sa milyon ka-tao ang apektado sa hiniusang epekto sa habagat ug miagong bagyong Luis ug Maymay.
Sa kataposang situational report sa National Disaster Risk Reduction and Management Council (NDRRMC) kagahapon sa buntag Lunes, Agosto 10, anaa sa kinatibuk-ang 585,993 ka indibidwal o bugti sa 170, 593 ka pamilya ang na-apektuhan sa kalamidad sa siyam ka rehiyon.
Ming-abot usab sa kapin 4,800 ka indibidwal ang gipa-ilawom sa pre-emptive evacuation sa Region I, III, Calabarzon ug Mimaropa.
Na-displace ang kapin 32,000 ka-tao samtang nagpabilin sa evacuation centers o sa ilang kabanay ang laeng 293.
Sa kasamtangan, 15 ka tao ang gikatahong namatay, 9 ang angol samtang aduna pay usa ka indibidwal nga nawala.
Nagpadayon usab ang gihimong validation sa konseho sa mga gitahong namatay sa kalamidad.
Gikomperma usab sa konseho ang pipila ka mga insidente kalabot sa epekto sa mga ming-igong kalamidad sa nasud lakip ang pagkalubong sa baha sa 635 ka lugar, landslide, insidente sa electrocution o pagka-kuryente, pagkahugno sa mga istruktura, adunay natala usab nga buhawi o makadaot nga hangin ug uban pang mga insidente.
