BUTUAN CITY – Misaka na sa kapin 400 ka mga gasoline stations sa tibook nasud ang natalang nagsirado sa Philippine National Police (PNP) taliwa sa padayon nga pagtaas sa presyo sa krudo ug produktong petrolyo.
Sigon ni PNP Spokesperson ug Public Information Office Chief PBGen. Randulf Tuaño, halos nadoble ang maong ihap gikan sa kapin 270 nga mga natalang nagsiradong gasolinahan niadtong nakalabay nga semana.
Base usab sa datos, kapin sa 14,300 nga gas stations sa tibook nasud ang padayon pa nga gimonitor sa kapulisan aron mapug-ngan ang hulga sa profiteering ug hoarding.
Sa pikas bahin, kauban ang Department of Energy (DOE), giimbestigahan na sa mga otoridad ang hinungdan sa likod sa pagsirado sa mga gasolinahan aron maseguro nga wala kini kalabutan sa pagpahimulos o pagtago og supply.
Una niini tulo na ang nakasuhan mahitungod sa iligal nga pagbaligya og lana, hoarding ug profiteering nga maoy natala sa Nueva Vizcaya ug Eastern Samar ug sa Albay.
