BUTUAN CITY – Nakasakmit og kapin 1.2-milyunes pisos nga suspected shabu atol sa gilusad nga anti-illegal drug operation sa Purok 6, Brgy Taligaman ning siyudad sa Butuan kaganina.
Bitbit ang search warrant nga gi-isyu sa local court, gisulod sa hini-usang operatiba gikan sa Butuan City Police Station 4 ug sa Agusan del Norte Maritime Police Station ang girentahang property sa suspetsado kinsa High-Value Individual (HVI) nga si alyas Fred, 23-anyos, kinsa nakasibat atol sa operasyon hinungdan nga nagpabiling at-large.
Apil sa nakumpiska ang 26 ka heat-sealed transparent plastic sachets sa suspected shabu, nga gibana-banang mitimbang og 180-gramos, uban sa usa ka digital weighing scale ug ubang mga drug paraphernalia ug gi-turn over na ngadto sa operating unit alang sa tukmang disposisyon.
Gi-andam na usab ang kasong ipasaka batuk sa target person nga paglapas sa Republic Act 9165, kansa i-file pinaagi sa regular legal procedures.
