BUTUAN CITY – Muabot sa kapin 19-mil ka mga public utility vehicles (PUV) sa tibuok nasud ang gikatakdang moapil sa government service contracting program (SCP) ugmang adlawa, Lunes, Abril 20.
Sumala ni acting Transportation Secretary Giovanni Lopez, gimandoan niya ang Land Transportation Franchising and Regulatory Board (LTFRB) nga tabangan ang mga kuwalipikadong drayber ug operator ubos sa service contracting program.
Apil usab dinhi ang mga nagparehistro pinaagi sa online registration.
Dugang pa sa opisyal nga sulod sa 24 oras kinahanglan naka-onboard na sila aron makasugod na sa pag-apil sa maong programa.
Tungod sa malampusong information campaign, adunay maayong pag-uswag ug misaka ang gidaghanon sa mga nagparehistro.
Ubos sa service contracting program, ang gobyerno mohatag og subsidiya nga P30 kada kilometro para sa mga jeepney, P40 kada kilometro para sa modern jeepney, ug P100 kada kilometro para sa mga bus.
Base sa pagbana-bana sa LTFRB, adunay unom ka biyahe matag adlaw ang EDSA carousel buses ug hangtod 100 kilometro matag adlaw alang sa mga bus, UV Express, ug jeepney.
Nagtuo ang opisyal nga kon mosaka ang gidaghanon sa mga nagparehistro, mosaka usab ang gidaghanon sa mga pasahero nga makabenepisyo sa maong programa.
