BUTUAN CITY – Kapin sa usa ka gatus gikan sa 1,311 ka mga barangay sa entiro Caraga Region ang gi-classify sa Police Regional Office kon PRO-13 nga anaa sa orange category kon areas of immediate concern tungod sa presensya sa mga komunistang terorista.
Kini subay na sa nagsingabot nga Barangay ug Sangguniang Kabataan elections karong Oktubre.
Sigon ni PCol. James Goforth, hepe sa Regional Operations Division sa Police Regional Office kon PRO-13, minimal lang ang presensya sa mga rebelde sanglit ang anaa ug hugot man ang pagbantay sa ilang counterpart nga kasundaluhan.
Ang maong klasipikasyon, gibase sa mga parameters nga gitakda sa Regional Intelligence Division sa Police Regional Office kon PRO-13. Apan ang mas gikalipay sa opisyal tungod kay walay barangay ning rehiyon ang anaa sa red category kon areas of grave concern nga gila-uman niyang dili ma-usab hangtud sa mismong adlaw sa Barangay ug Sangguniang Kabataan elections.
Gawas niini, laing siyam pa ka mga barangay ang anaa sa yellow category tungod na usab sa init nga away sa pulitika. Nasayrang sa 1,311 ka mga barangay sa entiro rehiyon, 1,100 niini ang ilang na-classify isip Areas of No Concern kon na-clear na gikan sa mga election-related incidents.
Samtang mu-abot sa 1,350 ka mga centers nga gi-cluster na ngadto sa mga precints ang ilang bantayan aron masiguro ang malinawon, hapsay ug luwas nga eleksyon sa Oktubre.
