BUTUAN CITY – Kapin sa 100 ka mga panimalay ang nasunog tungod sa dakong sunog sa lungsod sa Drammen, Norway.
Sumala sa mga rescue officials, natabunan og baga ug itom nga aso ang dapit nga nahimutang mga 50 kilometro gikan sa capital Oslo apan bisan pa man sa kadako sa sunog, wala’ ma’y na‑report nga namatay o nawala nga mga residente.
Kapin sa 60 ka bumbero ang gipakatap aron mapalong ang kalayo, ug gigamit usab ang mga helicopter nga nagbubo og tubig gikan sa kahanginan aron mapugngan ang pagkaylap sa sunog.
Tungod sa kusog nga hangin, dali nga mikaylap ang kalayo ug nakaabot pa sa kasikbit nga lasang, hinungdan nga gipapahawa sa mga awtoridad ang gatusan ka mga residente.
Padayon pa gihapon ang imbestigasyon sa mga awtoridad bahin sa gigikanan sa sunog samtang ginahimo ang assessment sa kadako sa kadaot.
