BUTUAN CITY- Mingsupak ang kanhi Court Sheriff nga si Abe Andres human matud pa kining malakip sa listahan sa mga testigong ipa-atubang sa impeachment trial batok kang Vice President Sara Duterte.
Si Andres ang kanhi court sheriff nga nahimong unod sa balita human kining gisumbag ni Sara Duterte niadtong Mayor pa kini sa Davao City.
Sa usa ka Facebook post kagahapon Biyernes, Hunyo 26, sigon ni Andres nga dili na kini ilambigit sa unsa man hisgutanang adunay kalabotan sa ”Partisan politics.”
Gipahinumdum usab niini, nga kini kasamtangang nagsilbi isip Human Resource Management Officer sa Korte Suprema ug isip usa ka second-level official, husto lang matud pa nga magpabilin kini nga walay gidapigan sa mga hisgutanang pampolitika.
Sumala pa ni Andres, dugay na niini gipili nga dili maghatag og unsa mang pamahayag kalabot sa insidenteng gikalambigitan niini kani-adto, ug igo na usab matud pa ang mga taho sa media kalabot niini.
Base sa pre-trial brief nga gipasaka sa House prosecution panel, lakip si Andres sa 8 ka testigong gilaomang magpakatinuod kalabot sa mga alegasyon batok kang VP Sara, lakip ang daw pagpanghulga sa kinabuhi ni President Ferdinand Marcos Jr., First Lady Liza Araneta-Marcos, ug kanhi House Speaker Martin Romualdez.
Sigon sa prosecution team, importante ang testimonya ni Andres aron suportahan ang ilang argumento nga adunay kapasidad matud pa ng mogamit og kapintasan ang bise presidente.
