BUTUAN CITY – Gikumpirma sa British lawyer nga gidagit sa emirates’s police ang kanhi asawa sa prinsipe sa Dubai ug ilang tulo ka mga anak.
Nasayran nga gibaharan na diay si Zeynab Javadli diha sa court papers ning nakalabay’ng duha ka mga buwan nga magsagubang siya og coercive force kung dili niini i-abanda ang kostudiya sa iyang mga anak.
Karon gipadayag sa iyang human rights lawyer nga si David Haigh nga gihimo sa Dubai Police ang maong hulga kagabii atol sa pag-raid sa iyang balay kondiin gikumpirma pa sa mga rulers sa Dubai ang maong hitabo kansa ilang gikondena rason nga gikabalak-an na sa abogado ang kaluwasan sa iyang kliyente ug mga anak niini.
Sa pagkutlo niini nga balita, wala pa masayri kung asa na si Zeynab Javadli, ang kanhi asawa ni Sheikh Saeed bin Maktoum bin Rashid Al Maktoum, pag-umangkon sa ruler sa Dubai nga si Sheikh Mohammed bin Rashid Al Maktoum.
Hangtud karon, wala na sila’y komunikasyon ni Zeynab ug bisan ang tanan niining mga kabanay ug mga higala. Karon mibiyahe ang inahan ni Zeynab tungod sa maong hitabo kondiin sirado na ang balay niini ug gisultihan pa siya nga dili na siya makabiya sa maong nasud.
