BUTUAN CITY – Gipadayag sa Iran nga wala pa sila’y pinal nga desisyon kabahin sa posibleng kasabutan nga nagtinguha sa pagwagtang sa tensiyon sa Tunga-tungang Sidlakan, bisan pa man sa pamahayag ni United States President nga si Donald Trump nga mahimong mapirmahan ang maong kasabutan sulod sa pipila ka adlaw.
Hugot kini nga gilimod sa Iran ilabina ang gipasi-atab nga nahuman na ang mga panaghisgot.
Sigon ni Iranian Foreign Ministry spokesperson Esmaeil Baqaei, wala pa sila’y desisyon sa bisan unsang kasabutan.
Gipadayag niini nga bisan aduna’y pipila ka teksto nga nasabotan na, napakyas kini tungod sa bag-ong mga kondisyon nga gipahamtang sa Estados Unidos.
Dugang pa sa Iran, dili dayon angayang motuo sa mga pamahayag ni Trump hangtod nga kini opisyal nga makumpirma nila.
Taliwala sa magkasumpaki nga mga pamahayag, gibutyag usab ni Trump nga napa-abot ug na-aprobahan na matud pa ang mga detalye sa kasabutan ngadto sa labing taas nga liderato sa Iran ug sa mga kaalyado niini sa rehiyon, lakip na ang Israel.
Sa bahin sa Israel, giingon nga nakigsulti na si Israeli Prime Minister nga si Benjamin Netanyahu kang Trump, diin ilang gihisgutan ang posibleng kasabutan nga magwagtang sa mga nuclear materials sa Iran ug magpahuyang o moguba sa kapasidad niini sa mga missiles.
