BUTUAN CITY- Gibutyag sa Iran nga ilang gipalapdan pag-ayo ang lugar palibot sa Strait of Hormuz diin ilang giangkon ang kontrol sa militar sa paningkamot nga ipadayon ang ilang soberanya sa importanteng ruta sa pamatigayon, pinaagi sa bag-ong gihimo nga “Persian Gulf Strait Authority” kansa nag-angkon og kontrol sa kapin 22,000 sq km nga naglakip pa sa teritoryo sa Oman ug United Arab Emirates.
Sumala sa UAE nga kini “fragments of dreams” ug wala’y legal nga basihanan. Ang US ug mga kaalyado sa Gulf nagpasidaan sa mga barko nga dili mosunod sa balaod sa Iran, samtang gipakita sa Islamic Revolutionary Guard Corps kon IRGC media ang footage sa giingong “punishment strike” sa tanker Barakah. Sa laing bahin, gi-boarding sa US forces ang oil tanker Celestial Sea nga giingong mosupak sa blockade sa Iranian ports, apan gibuhian human sa inspeksyon ug gi-direkta sa Oman.
Sukad Abril 13, gibutyag sa Centcom nga nakapahunong na sila og 94 ka barko ug nakapahawa og upat ka sakayanan. Samtang nagpadayon ang tensyon, si US President Donald Trump mipahibalo nga iyang gipahunong ang planong military strike batok sa Iran tungod sa hangyo sa Gulf states nga nagpasabot nga adunay “serious negotiations.”Ang hepe sa militar sa Pakistan, nga si Asim Munir, anaa sa Tehran aron magpasig-uli og negosasyon tali sa Iran ug US.
