BUTUAN CITY – Gikumpirma sa Surigao del Sur Provincial Health Office (PHO) ang unang kaso sa monkeypox kon Mpox sa ilang lalawigan kansa ikatulo na sa Caraga Region
Sigon sa PHO, nagpakonsulta ang pasyente sa usa ka health facility human nakasinati og mga simtomas sa maong sakit sama sa mga skin rashes, hilanat, kalapoy sa lawas ingon man harat nga tutunlan kon sore throat.
Human gisusi ang pasyente, gi-isolate gilayon kini human nasayrang duna kini travel history sa lugar nga duna’y kaso sa mpox ug nakig-alayon gilayon sila sa Department of Health-Caraga Region, ug sa kagamhanang lokal diin nagpuyo ang pasyente alang sa dinali-ang contact-tracing ug padayon na karong gi-monitor.
Abiso sa PHO sa mga residente, magpabiling kalmado apan ma-ampingon ug padayong sundon ang minimum public health standards.
Gipaniguro usab ni Provincial Health Officer Dr Oscar de Jesus nga mapabiling kontrolado ang kaso sa Mpox samtang padayon ang ilang information dissemination aron kini malikayan ug masayran ang paagi sa pagtambal niini.
Gawas sa Surigao del Sur, nakatala usab og tag-usa ka kaso sa Mpox ang Agusan del Sur ug ang Dinagat Islands provinces.
