BUTUAN CITY – Gisusi na sa World Health Organization kung adunay bakuna o tambal nga makatabang aron mapugngan ang kasamtangang outbreak sa Ebola sa Democratic Republic of Congo.
Sa pagkakaron, 131 ka mga tawo na ang gitu-uhang namatay ug kapin 500 ang natakdan sa sakit rason nga gideklara kini sa WHO nga usa ka international health emergency
Matod sa WHO, wala pay bakuna o tambal nga espesipikong alang sa Bundibugyo strain sa Ebola nga maoy hinungdan sa outbreak karon.
Ang mga bakuna karon alang lamang sa Zaire strain. Usa sa mga bakunang ilang gisusi mao ang Ervebo, apan posible pa nga mu-abot pa sa duha ka bulan una kini magamit.
Nagpasidaan usab ang WHO nga posibleng dugay pa matapos ang outbreak, sama sa miaging Ebola outbreak nga miabot og duha ka tuig.
Nagpadala na ang WHO og kapin 40 ka eksperto ug medical supplies sama sa PPE ngadto sa apektadong lugar aron tabangan ang mga health workers ug mga pasyente.
