BUTUAN CITY – Imbestigahan sa kapulisan ang mga nag-escort sa duha ka samdang gitu-uhang mga rebeldeng New People’s Army nga na-intercept sa Provincial Quarantine Control Point/Checkpoint sa Purok 3, Barangay Payasan, Lianga, Surigao del Sur kagahapon sa alas-10:55 sa buntag.
Kini aron masayran ang hinungdan sa pagbaton ug mga samad-pinusilan sa mga biktimang gikarga sa tulo ka mga ambulansya sa International Committee of the Red Cross nga nailang sila Noel Dadang, 32-anyos, minyo apan wala mihatag sa iyang address kinsa duna’y samad sa wala nga bahin sa tiyan ubos sa gusok samtang ang usa pa nailang si Jea Angeles Perez, 22-anyos, residente sa Purok 4, Brgy. Puyat, lungsod sa Carmen, Surigao del Sur ug dunay samad sa tuo nga tiil.
Sa eksklusibong pakighinabi sa Bombo Radyo Butuan, gipadayag ni PMajor Renel Serrano, information officer sa Police Regional Office kon PRO-13, nga nakadawat og impormasyon ang kapulisan sa Lianga nga duna matud pa’y samarong rebeldeng New People’s Army kon NPA nga gisakay sa ambulansiya, rasong gipahunong ang tulo ka sakyanan sa ICRC.
Sumala ni Serrano, dako ang posibilidad nga kini mga rebelding NPA human nasayran nga gikan ang mga angol sa Brgy. Janipaan, lungsod sa San Miguel, Surigao del Sur kansa parte sa Andap Valley Complex diin natigayon ang sunod-sunod nga engkwentro ning mi-aging semana nga miresulta sa pagkamatay sa 11 ka mga rebelde.
Apil sa ilang gi-hold ang tulo ka mga kolor puti nga Hi-Ace van nga maoy gigamit nga ambulance vehicles sa ICRC lakip ang mga drivers nga sila Ian Dominguez Adlawan, 38-anyos, minyu, residente sa Nabunturan, Davao de Oro; Marjun Velez Gabia, 46-anyos, menyu, nagpuyo sa P-3, Agro Comp, Brgy 76-A Davao City og Jose Junrie Quisquis Lomoljo, 40-anyos, residente sa Tukananes, Cotabato City ingon man ang mga escorts nga sakay sa maong mga ambulansya.
Ang mga samaron gi-refer na ngadto sa Davao Regional Medical Center alang sa medical treatment.
Gihimo gilayon ang koordinasyun sa Provincial Directors sa Agusan del Sur PPO, Davao de Oro PPO og Davao del Norte PPO rasong pag-abot sa Regional Quarantine Control Point/Checkpoint sa Barangay Pasian, Monkayo, Davao de Oro, ang mga ginsakpan gikan sa Bravo Company, 25th Infantry Battalion, Philippine Army midawat sa convoy og gi-escortan padulong sa Davao Regional Medical Center sa Tagum City, Davao del Norte.
Alayon niini, gipanawagan ni Serrano ang mga rebeldeng samaron nga anaa pa sa kabukiran nga andam ang mga ospital pag-atiman kanila nga libre ug kinahanglan lang silang modool sa pinakadool nga unit sa Philippine Army o kaha sa police station aron sila mapatambalan.
Ang maong control point gilangkuban sa mga sakop sa Lianga Municipal Police Station, 1st Surigao del Sur Provincial Mobile Force Company og 9th Special Force Company sa 3rd Special Forces Battalion, Philippine Army.
