BUTUAN CITY – Okupado na ang House prosecution panel sa makuting pagpangandam alang sa impeachment trial ni Vice President Sara Duterte sa Senado.
Gihulagway ni Batangas Rep. Gerville Luistro ang ilang sitwasyon nga daw subling mibalik sa pagpangandam para sa Bar examinations tungod kay halos tanang miyembro sa panel nag-review sa rules on evidence ug uban pang legal nga proseso.
Sumala ni Luistro, nagpahigayon ang grupo niadtong Miyerkules og “prosecutors learning from prosecutors” session nga gipangunahan ni Rep. Chel Diokno.
Gihisgutan niini ang mga patakaran sa ebidensya ug mga lakang sa proseso sa pagtaral.
Dungan niini, giplastar na usab sa panel ang listahan sa mga testigo, mga dokumento, video, ug uban pang ebidensiyang iatubang para sa matag artikulo sa impeachment.
Gitin-aw ni Luistro nga dili lang mga papeles ang ilang ihaon kundi bisag ang nagkadaiyang materyales nga makatabang sa pagdungog.
Mahinumdumang giaprubahan sa Kamara ang impeachment complaint batuk kang Duterte may kalabutan sa matud pa sayop nga paggamit sa confidential funds, mga isyu sa SALN, dili matud pa mapasabot nga bahandi ug kontrobersyal nga pamahayag mahitungod sa paghulga sa Pangulo ug uban pang opisyal.
Gitumbok ni Luistro nga ang impeachment dili lang simpleng legal nga proseso kundi usa ka mekanismo aron matumbok kung angayan pang magpabilin sa puwesto ang usa ka taas nga opisyal sa gobyerno.
