BUTUAN CITY – Gipaniguro ni kanhi Senador Leila de Lima nga mutambong pa gihapon siya sa pagpadayon sa hearing sa iyang mga kasong dunay kalabutan sa ginadiling droga karong adlawa, usa ka adlaw human ang pag-hostage kaniya sa tulo ka mga inmates sa mismong Philippine National Police Custodial Center sa Kampo Crame kagahapon sa alas-6:30 sa sayong buntag.
Himuon pagdungog sa Regional Trial Court (RTC) Branch 256 sa Muntinlupa Regional Trial Court (RTC) nga naka-schedule pasado ala-1:30 sa hapon.
Sa pakighinabi usab kang Atty. Filibon Fabela Tacardon, legal counsel ug spokesperson ni Delima, gikumpirma niining mipa-ilalom na sa medical checkup si Delima ug gitun-an na nila ang hangyo nga ibutang kini sa house arrest.
Kagahapon personal nga gibisita ug gikumusta ni Department of Interior and Local Government kon DILG Secretary Benhur Abalos si de Lima sa PNP Custodial Center ug nasutang luwas ug anaa kini sa maayong kondisyon apan makita sa hitsura niini ang trauma sa maong insidente.
Sigon ni Sec. Abalos, base sa mandu ni Pangulong Ferdinand Marcos Jr. ibalhin si de Lima sa ubang facility para mas luwas kini apan mibalibad si De Lima ug mas gipili niini nga magpabilin sa iyang pasilidad.
Gitahasan na usab ni Abalos ang PNP nga muhimo og lawom nga imbestigasyon ug usabon ang mga protocols sulod sa PNP Custodial Center. Gusto usab nga masayran sa kalihim kung dunay lapses sa han-ay sa mga nagdumala sa prisuhan. Sa karun temporaryo unang gisuspinde ang visiting hours sa Custodial Center.
