BUTUAN CITY – Pormal nang gilusad kaganina sa Sitio Amongon, Brgy. Noli, Bayugan City, lalawigan sa Agusan del Sur ang Home Defense Village nga alang sa 30 ka mga kanhi rebeldeng New People’s Army kon NPA nga mibalik na sa sabakan sa balaud.
Sa eksklusibong pakighinabi sa Bombo Radyo Butuan, gipadayag ni PMajor Renel Serrano – information officer sa Police Regional Office kon PRO-13, ang maong village duna’y gilapdong 9-ektarya dili lang puy-an sa 30 ka mga kanhi rebelde kondili mao usab ang himuon nilang tuburan sa panginabuhian tungod kay gamiton nila kini sa pagpananom.
Tudlu-an matud pa sila sa paagi pagpananom sa mga taga – Department of Agriculture kon DA-Caraga; ug ipa-avail sa mga programa sa Technical Education Skills and Development Authority kon TESDA ug uban pang ahensya sa kagamhanan.
Apan giklaro ni Major Serrano nga kini pilot project pa lang tungod kay duna’y gitagana ang lokal nga kagamhanan sa Bayugan City nga 350-ektaryang luna nga bahinon sa laing 50 ka mga kanhi rebelde kondiin tag-siete ektarya sila.
Pinaagi sa maong inisyatiba ni PRO-13 regional director Joselito Esquivel Jr., uban sa pag-abag sa Bayugan-LGU ug uban pang ahensya sa gobyero, mas matutukan na sa hingpit sa mga kanhi rebelde ang pagbag-o sa ilang kinabuhi uban sa ilang pamilya aron magpakabuhing normal ug dili na magtago-tago pa sa balaud.
