BUTUAN CITY- Gikomperma sa Department of Foreign Affairs (DFA) nga motambong ang tanang heads of state sa mga silingang nasud sa Association of Southeast Asian Nations (ASEAN) sa ASEAN Summit 2026 sa Cebu, gawas sa leader sa Myanmar.
Sumala ni DFA Assistant Secretary ug ASEAN spokesperson Dominic Xavier Imperial, dili ang bag-ong lider sa Myanmar ang mtambong kundi ang representante lang sa ilang Ministry of Foreign Affairs.
Hinuon, ipadala sa Myanmar ang Permanent Secretary sa foreign ministry ug ang representate sa Senior Officials’ Meeting (SOM).
Una nang napili isip Presidente sa Myanmar si Min Aung Hlaing pinaagi sa parliamentary vote niadtong Abril, human kining mingsaka sa puwesto sunod sa kudeta niadtong 2021 nga nagpalagpot sa gobyerno ni Aung San Suu Kyi.
Sumala ni Imperial, nagpabilin ang desisyon sa mga lider sa ASEAN nga limitahan ang representasyon sa Myanmar sa mga minglabay nga summit tungod sa padayon nga krisis sa nasud.
Dugang pa niini, nga nagpabiling ipatuman ang kanhi desisyon nga ang representasyon sa Myanmar anaa lamang sa lebel sa SOM leader ug Permanent Secretary.
Samtang, sigon usab sa opisyal nga wala pay consensus ang ASEAN kung ilhon bag-ohay nga election sa Myanmar.
Padayon usab nga gimonitor sa bloc ang implementasyon sa five-point consensus kansa nanawagan sa paghunong sa kapintasan ug pagpadala og humanitarian aid sa Myanmar.
Ang ASEAN gimugna og mga nasud sama sa Pilipinas, Brunei, Cambodia, Indonesia, Laos, Malaysia, Singapore, Thailand, Timor-Leste, Vietnam, ug Myanmar.
