BUTUAN CITY- Gikatakdang mopahigayon og imbestigasyon ang Senado kalabot sa padayon nga pagsaka sa presyo sa bugas ug uban pang produkto sa agrikultura, subay sa posibleng manipulasyon sa lokal nga merkado og mga nag-unang palaliton.
Sa usa ka Press Conference sa Kapihan, Manila Bay, gihatagan og gibug-aton ni Senador Sherwin Gatchalian, chair sa Senate Committee on Ways and Means, ang panginahanglanong pag-imbestiga sa mga talagsa-ong lihok sa presyo sa mga palaliton, hilabi na ang sayo nga pagsaka sa presyo sa bugas.
Sumala ni Gatchalian, adunay pagduda nga adunay mga market players nga gipahimuslan ang sitwasyon aron magsaka og presyo sa bugas.
Pag-insistar sa senador, direktang naapektuhan sa pagsaka sa presyo sa bugas ang mga pamilyang Pilipino.
Gipasabot usab ni Gatchalian, nga dili angay magpasaka gilayon og presyo sa pipila ka hinungdan sama sa fertilizer cost, tungod kasagari mogawas ang epekto niini panahon pa sa anihan kansa gilaoman sa buwan sa Hunyo o Hulyo.
Gisugyot usab sa senador nga posibleng pangunahan sa Senate Committee on Agriculture nga gipangulohan ni Senador Francis Pangilinan ang maong imbestigasyon.
Gipasi-ugda pa ni Gatchalian nga adunay mga indikasyon sa “sayong paglihok” sa presyo, nga posibleng adunay kalabotan usab sa pagsaka sa presyo sa lana.
Tumng sa imbestigasyon nga masuta kung adunay kartel, importer, o trader nga manipulasyon sa supply ug presyo, aron maprotektahan ang mga consumers batok sa dili makatarnganong pagsaka sa mga nag-unang palaliton.
