BUTUAN CITY- Pormal nga gidawat kagahapong adlawa Mayo 6, sa local nga panggamhanan sa Surigao City si Consulate General Japan in Davao Ono Hirotaka, atol sa iyang opisyal nga pagbisita sa siyudad.
Gipangulohan ni Mayor Pablo Yves Dumlao II uban ni Vice Mayor Alfonso Casurra ug mga miyembro sa Sangguniang Panlungsod ang seremonyal nga pagdawat, nga nagpakita sa determinasyon sa Surigao sa pagpalig-on sa international relations ug pag-explore sa local development partnerships. Lakip sa programa ang pagbisita sa Battle of Surigao Strait Memorial sa Punta Bilar, diin gipresentar niini ang mga memorabilia ug kasaysayan sa gubat nga gisaulog matag tuig isip pahinumdom sa kalinaw.
Human sa tour, gipahigayon ang usa ka lunch meeting diin gipresentar sa lokal nga pamahalaan ang mga prayoridad nga proyekto sama sa water impounding system, mariculture park, ug tuna farming, kansa nagbukas og posibilidad sa kooperasyon tali sa Japan ug Surigao City. Ang pagbisita ni Hirotaka, nagsilbing oportunidad sa pagpakita og potensyal sa Surigao isip usa ka hub sa pamuhunan, turismo, ug global partnership sa Mindanao.
Sa kataposan, gipadayag ni Mayor Dumlao ang iyang mapasalamaton nga pagbati ug paglaum nga magpadayon ang kolaborasyon nga maghatag og dugang benepisyo ug oportunidad alang sa katawhan sa Surigao.
