BUTUAN CITY Gibutyag karon sa Department of Health DOH- Caraga nga hanap makab-ot ang herd immunity kon population protection sa rehiyon karong tuiga.
Sa pakighinabi sa Bombo Radyo Butuan, gibutyag ni DOH-Caraga Assistant Regional Director Dr. Sadaila Raki-in, kini tungod sa ubay-ubay nga rason ug mga pagsulay.
Sumala kang Dr. Raki-in usa sa rason niini ang pakyas nga pagkab-ot sa target nga ihap nga mabakunahan sa matag adlaw sa ubang Local Government Units sa rehiyon.
Gipananglitan niini ang sitwasyon dinhi sa dakbayan diin required nga mabakunahan ang anaa sa 6,000 pataas ka mga indibidwal sa usa ka adlaw aron makab-ot ang target nga 70 percent nga population protection adiser matapos ang bulan sa Disyembre.
Apan sa kasamtangan anaa lamang sa 2,000 hantod 3,000 ang kayang mabakunahan nga indibidwal sa syudad. Gawas matod kini sa kakulangon sa man power o kadtong mga health workers nga motupok sa bakuna, vaccination sites ug uban pa.
Taliwala niin, malaumon si Dr. Raki-in nga makatabang unya ang tulo ka adlaw nga National Vaccination Day aron makadugang-dugang nga mapaduol sa target nga ihap sa mga mabakunahan ug makab-ot ang 70% herd immunity nga magsugod karong Nobyembre 29, 30 ug December 1.
Sa hisgutanan usab nga kakulangon sa mga medical workers nga motupok sa mga bakuna, labi na sa umaabot nga “Three Days Vaccination Day” gipadayag ni Dr. Raki-in nga nakig-alayon na sila sa mga LGUs sa rehiyon ug sa ubang ahensya labi na sa mga meimbro o trabahante niini nga adunay kabalo sa paghatag og atensyong medikal aron makatabang sa maong lakang.
