BUTUAN CITY – Gi-andam na ang mga dukomento, ebidensya ug testimoniyang gamiton alang sa ipasakang mga kasong criminal ug administratibo batuk sa hepe sa kapulisan sa Buenavista, Agusan del Norte human siya nahulog sa gilusad nga entrapment operation nga gihimo sa iyang mga ka-ubanang police officers pasado alas-4:30 kagahapon sa hapon subay sa gilambigitan niining robbery-extortion.
Naila ang suspek nga si Police Captain Junil Gultiano, 44-anyos, Officer-in-Charge sa Buenavista Municipal Police Station, ug residente sa Brgy. San Vicente ning siyudad sa Butuan.
Gihimo ang entrapment sa mga operatiba sa PNP Integrity Monitoring Enforcement Group kon IMEG Mindanao Field Unit uban sa Agusan del Norte Provincial Intelligence Unit, Regional Intelligence Unit 13 ug sa PNP Special Action Force kondiin iyang gidawat ang usa ka libo ka pesos nga marked money.
Gihimo ang operasyon base na usab sa reklamo sa mga negosyante sa maong lungsod tungod sa iya matud pang pagpangilkil og tag-500 pesos kada-semana gikan sa mga membro sa Buenavista Furniture Association gawas pa sa tag-singko pesos kada-board feet sa matag-ginabas nga kahoy’ng mahalin.
Gika-ingong gihulga sa suspek nga arestuhon ang mga membro sa maong furniture association nga dili matud pa makahatag sa iyang demand p kaha ipa-ilalom sa police operation ang ilang tindahan.
Sa ekskilusibong interview sa Bombo Radyo Butuan, gipadayag ni Police Provincial Director Lt. Col. Ramir Perlito Perlas nga pasakaan og mga kasong kriminal og administratibo ang suspek kinsa dismissal order iyang i-proseso.
Apil sa mga kasong ilang ipasaka ang paglapas sa Republic Act No. 3019 kon Anti-Graft and Corrupt Practices Act ingon man paglapas sa Republic Act No. 6713 kon mas nailang Act Establishing a Code of Conduct and Ethical Standards for Public Officials and Employees.
Photo CTTO
