BUTUAN CITY- Padayon ang Philippine Drug Enforcement Agency kon PDEA Caraga sa pagpanguna sa mga kalihokan batok sa iligal nga droga, aron masiguro ang kaluwasan sa katawhan.
Sumala ni Dindo Abellanosa tigpamaba sa PDEA Caraga, nga sa Surigao del Sur, bisan wala pa’y natalang anti-drug operations padayon gihapon ang pagbisita sa mga nalambigit sa paggamit og droga aron agnihon sila nga mosalmot sa Community-Based Drug Rehabilitation Program sa barangay ug Local Government Units kon LGUs.
Sigon pa niini, ang mga provincial offices usab aktibong mingsalmot sa mga Barangay Anti-Drug Abuse Council kon BADAC meetings, kung asa ginasusi ang mga aplikasyon alang sa retention ug drug-free status. Gibutyag usab sa tigpamaba, nga samtang nagpadayon ang operasyon sa ubang law enforcement agencies, usa ka operatiba ang naigo sa kamatayon niadtong Miyerkules ug gihatagan og pasidungog ang iyang sakripisyo isip kabahin sa peligro sa trabaho.
Sa laing operasyon, usa usab ka 57-anyos nga suspetsado ang kalit nga giatake sa kasing-kasing, ug gipahinumdom nga bisan pa sa ilang pagkasuspetsado, gitahod gihapon ang ilang tawhanong katungod hangtod makahatag og desisyon ang korte.
