BUTUAN CITY – Nagtingkagol na karun sa prisuhan ang duha ka mga suspetsado human nakumpiska gikan sa ilang posisyon ang muabot sa 1.8 milyones pesos nga kantidad sa smuggled nga sigarilyo didto sa Sitio Pitogo, Purok 3, Brgy. Sto. Niño, Jabonga, Agusan del Norte sa nakalabay nga adlaw.
Gipahigayon ang maong operasyon sa Jabonga Municipal Police Station kauban ang 2nd Agusan del Norte Provincial Mobile Force Company nga miresulta sa pagkasikop sa mga suspek.
Sigon ni PCOL APRIL MARK C YOUNG, Provincial Director sa Agusan del Norte Police Provincial Office, gihimo ang Anti-illegal Smuggling Operation batok sa mga Counterfeit Tobacco Products nga miresulta sa pagkasikop ni alyas “Aradillos”, 45 anyos, lalaki, ulitawo, ug residente sa Purok 2, Brgy. Tolosa, Cabadbaran City, Agusan del Norte; ug alyas “Dominador”, 34 anyos, lalaki, ulitawo, laborer, ug residente sa Purok 2, Brgy. Bay-ang, Cabadbaran City, Agusan del Norte.
Sa gihimong pag-search, nasakmit sa mga awtoridad ang 41 ka Reams Champion Menthol nga sigarilyo; 930 Reams Cannon Menthol nga sigarilyo;100 Reams Champion Menthol nga sigarilyo; 50 Reams Cannon Menthol nga sigarilyo; 100 Reams Champion Menthol nga sigarilyo; 300 Reams Champion Itom nga sigarilyo; 53 Reams Green Hills nga sigarilyo; 50 Reams Bros nga sigarilyo; 100 Reams New Aris nga sigarilyo; 50 Reams nga sigarilyo sa Astro; 49 Reams ug lima ka pakete nga sigarilyo sa Astro; 24 Reams ug 18 Packs Champion Black sigarilyo; 11 Reams Casa Blanca nga sigarilyo, Three Reams ug Three Packs sa Green Hills nga sigarilyo, ug Two Reams of Champion Black nga sigarilyo, gikarga sa usa ka Utility Vehicle Wagon nga nagdala sa Plate No. XKK 367.
Gikustudiya ang mga nakumpiska nga kontrabando sa Jabonga MPS samtang gihikay ang kasong atubangon sa mga nadakpan.
