BUTUAN CITY – Subling mipatigbabaw si Heart Evangelista sa international fashion scene human manguna sa uban pang mga celebrities ug fashion influencers nga mitambong sa Paris Haute Couture Week Fall/Winter 2026–2027.
Sumala sa data analytics firm nga Launchmetrics, si Heart mao ang No. 1 celebrity voice gikan sa Pilipinas sa maong prestigious fashion event nga gihimo sa Paris.
Base sa pagsusi sa Launchmetrics sa mga content nga gipagawas gikan Hulyo 4 hangtud 16, naka-abot sa $7.5 milyon ang Media Impact Value (MIV) nga namugna sa mga posts ni Heart may kalabotan sa Haute Couture Week.
Ang maong kantidad nagrepresentar sa kapin 96% sa kinatibuk-ang $7.8 milyon nga MIV nga na-record sa Pilipinas.
Ang MIV usa ka sukdanan sa kantidad sa publicity ug exposure nga namugna gikan sa social media posts, online articles, mentions, interactions ug uban pang content bahin sa usa ka celebrity, influencer, brand, o fashion event.
Gisusi niini ang reach ug engagement sa matag-post, ug ang epekto niini sa mga fashion houses ug brands nga gipakita sa celebrity o influencer.
