BUTUAN CITY – Nakatala og kapin sa 61-mil ka indibidwal ang nadakpan sa mga otoridad human gipatuman ang mas hugot nga implementasyon sa Safer Cities Initiative nga gipangulohan sa Department of the Interior and Local Government (DILG) ug Philippine National Police (PNP) gikan Abril 6 hangtod Abril 11.
Base sa datos, sobra sa 18,900 ang natala ubos sa mga common offenses sama sa pag-inom sa kadalanan ug panigarilyo sa mga pampublikong lugar.
Apil usab sa rekord ang dul-an sa 526 ka kaso sa paggawas nga walay sul-ob nga pang-itaas nga senina kon naghukas, 586 ka mga milapas sa enhanced curfew hours, ug 70 ka mga kaso nga may kalabutan sa karaoke.
Samtang kapin sa 30-mil ka mga paglapas ang natala ubos sa mga nagtunhay nga lokal nga ordinansa sama sa loitering, public disturbance, ug uban pang susama niini.
Sumala kang PNP Chief PGen. Jose Melencio Nartatez Jr., ang resulta sa mga operasyon nagpakita sa mas gipalig-on nga police visibility ug mas hugot nga koordinasyon sa lokal nga mga awtoridad aron mapadayon ang kalinaw ug kahapsay.
Sa laing bahin, mahinumduman nga adunay pipila ka mga human rights group nga mipahayag og ilang baruganan batok sa programa ug ilang gitawag kini nga anti-poor.
Bisan pa man niini, mibarug gihapon ang PNP ug DILG nga ang estriktong implementasyon niini dili aron silotan ang publiko, kundili aron maprotektahan sila batok sa posibleng krimen ug himuong mas luwas ang mga komunidad.
