BUTUAN CITY – Libreng training ang ihatag sa Digital Transformation Center kon DTC, ang unang informal school o training center ning rehiyon sa Caraga nga gitukod sa Agusan del Sur human kini gisubhan.
Sa eksklusibong pakighinabi sa Bombo Radyo Butuan, gipadayag ni Department of Information and Communications Technology kon DICT assistant secretary Alan Silor, ang nasangpit nga center duna’y 20 ka yunit sa computers ug duna na’y internet connection, air conditioned paug duna’y training room.
Gawas niini, duna usab kini de-kalidad nga mga trainers alang niadtong gustong mabansay sa mga digital online jobs. Dugang pa ni Sec. Silor, dumalahon kini sa ilang rehiyunal nga buhatan tungod kay bisan ang mga taga-local government unit, wala pa may kinahanglan pa gihapon nga mupa-ilalom sa training.
Ha-um matud pa kini sa kasamtangang panahon ilabina nga uso karon ang online freelancing ug niadtong gustong mukita nga dili na mu-adto pa sa work place.
Giklaro usab sa opisyal nga bisan og welcome sa maong center ang mga indibidwal nga duna’y trabaho apan gusto lang makakutay og internet apan mas prayuridad nila nga hatagan og training kadtong mga wala pa’y trabaho ilabina kadtong mga nawad-an og trabaho atol sa pandemya.
Wala’y gastuhon bisan og usa ka dako ang gustong mu-avail sa training gawas nga libre pa usab silang makagamit sa ilang mga kagamitan aron sila mismo ang mag-hands on sa ila unyangmakat-unan.
Duna pa’y sunod nga tukurong ingon niini nga center sa ubang bahin sa rehiyon.
