BUTUAN CITY – Emusyunal nga nagpakilooy ug mihangyu ang ginikanan sa gidagit nga sundalo sa Surigao del norte, ngadto sa mga rebelding grupo nga buhi-an ang iyang anak.
Sa eksklusibong pakighinabi ning sibyahan kang Ernesto Salan, mihangyu kini nga maka-estorya ang iyang anak.
Gihulagway pa niini nga usa ka bootang bata ang iyang anak nga 5 ka tuig na sa serbisyu isip sundalo. Kanunay matud pa kining manawag kanila ug mangumusta.
Blangko usab sila sa katuyu-an sa mga nidagit kaniya tungod kay wala may nahimo kini nga atraso.
Gi-asuy pa sa amahan nga gitawagan siya sa opisyal sa iyang anak aron ipahibalo ang nadangatan sa biktima.
Nangaligo lang matud pa ug falls kauban ang sibilyan didto sa Alegria, Surigao Del Norte, ang biktima sa dihang giti-unan sa gibana-banang 15 ka mga armadong kalalakihan ug gidala padulong sa kabukiran.
Susamang pakilooy usab nga gihimu sa inahan sa biktima nga si Editha Salan nga unta buhi-an ang iyang anak.
