BUTUAN CITY – Ipa-ilalom na sa polygraph test kon lie detector test ugmang adlawa, Agusto 14 sa Cagayan de Oro City ang magti-ayong Wilma ug Junrey Meñoza, ginikanan sa pataynang napalgang si Ian Meñoza, ang 2-anyos nga batang una nang gikataho sa iyang inahan nga na-missing.
Gipadayag kini ni Butuan City Police Station 4 commander PMajor Aian Gilbert Lodonia human nga wala’y ka-usaban sa pamahayag sa magti-ayon taliwa nga duna’y napalgang lama sa dugo sa salog ug bungbong sa sala sa ilang balay sa Brgy Camayahan ning siyudad sa Butuan.
Una nang gibutyag sa opisyal nga napalgan ang maong lama sa dugo dihang ilang gihimo ang crime scene reconstruction sa panimalay sa pamilya Meñoza, kansa gipa-ilalom na sa laboratory examination sa Scene of the Crime Operations kon SOCO aron pagsuta kung dugo ba kini sa tawo o sa mananap.
Dugang pa ni Major Lodonia, sila mismo ang mag-escort sa magti-ayon ngadto sa Cagayan de Oro City ug dinhi matud pa masayran kung ma-usab sa magti-ayon ang ilang pamahayag ug masuta kung namakak ba sila o wala.
Sa pagkakaron, iyang gibahin-bahin ang iyang mga sakop aron duna usa’y mag-imbestiga sa lugar diin napalgan ang patay’ng lawas sa bata apil na ang posibleng third party nga nalambigit sa kremin.
Kini human gipadayag sa amahan nga Junrey nga duna matud pa sila’y abangi ning nakalabay’ng mga buwan adiser na-missing ang ilang anak.
