BUTUAN CITY- Gideklara na nga ubos sa State of Calamity ang dakbayan sa General Santos human sa kusog nga Magnitude 7.8 nga linog nga miigo sa siyudad kagahapon sa may alas-7:37 sa buntag.
Kini human nagpatawag si Mayor Lorelei Geronimo Pacquiao og ikapitong espesyal nga sesyon sa 21st Sangguniang Panlungsod kung asa giaprobahan ang resolusyon alang sa maong deklarasyon. Tumong niini nga mapaspasan ang paggamit sa pondo alang sa dali nga pagtabang sa mga residente ug lugar nga grabeng naapektuhan sa linog.
Sumala sa Sangguniang Panlungsod, gihimo ang deklarasyon aron masiguro ang paspas ug epektibong paghatag og responde sa panginahanglan sa mga lumulupyo human sa maong pag-uyog nga nakaigo sa dakbayan.
Una nang mirekomenda ang General Santos City Disaster Risk Reduction and Management Council sa pagdeklara og State of Calamity human sa linog nga nakaparehistro og Intensity VI sa siyudad.
Base sa inisyal nga assessment, adunay daghang kadaot nga natala sa mga building, imprastraktura, ug uban pang pampubliko ug pribadong pasilidad. Padayon usab nga gibantayan sa mga otoridad ang posibleng aftershocks nga mahimong mosunod.
Ubos sa State of Calamity, mas mapaspasan ang mobilisasyon sa pondo ug pagpatuman sa mga lakang alang sa emergency response, relief operations, ug rehabilitasyon. Gilauman usab nga mas molig-on ang koordinasyon sa nagkalain-laing ahensya sa gobyerno aron mapanalipdan ang kinabuhi, kaluwasan, ug kaayohan sa publiko.
Samtang niini, padayon ang monitoring ug damage assessment nga gihimo sa mga may kalabutan nga opisina aron matino ang tibuok gidak-on sa kadaot nga nahatag sa linog.
Sumala pa sa City Disaster Risk Reduction and Management Office, miabot na sa 142 ang gidaghanon sa mga nasamdan, unom ang padayon nga nawagtang, samtang 11 na ang kumpirmadong namatay samtang nagpadayon ang assessment ug response operations sa siyudad.
