BUTUAN CITY – Gikahimut-an ug gipasigarbo ni Director Abel James Monteagudo, regional executive director sa Department of Agriculture kon DA-Caraga, ang pagsunod sa Bombo Radyo Butuan sa ilang panawagan nga magtanom sa nataran karong panahon sa COVID-19.
Nasayrang sorpresang mibisita sa sibyahan ang opisyal aron pagsusi kung unsa na ang gi-abot sa mga similya sa gulay nga ilang gitunol ning sibyahan.
Nasayrang kabahin sa ilang COVID-19 response ang pag-awhag sa katawhan nga mananom og mga lagutmon diha sa mga nataran sa kabalayan aron duna’y makaon ilabina nga ning kasamtangang sitwasyon nga hatud sa pandemya, lisod ang pagkaon tungod sa kawala’y kita sa kadaghanang mga tawo.
Gikalipay ni Director Monteagudo ang gihimo sa Bombo Radyo Butuan tungod kay wala lang kini nagpahibalo sa katawhan sa ilang mga programa aron duna’y ikabayang nga pagkaon sa lamisa kondili mi-apil kini sa mga nananom kansa makonsiderang modelo alang sa tanan.
Nasayrang higayong bakante sa oras, nag-iyahay og pananom ang mga personahe sa Bombo Radyo Butuan nga nagsugod dihang gipa-ilalom na sa community quarantine ang siyudad tungod sa hulgang hatud sa COVID-19.
Gawas niini, nagtunol usab ang opisyal og mga gamit pang-uma ingon man seedlings aron madugang sa mga lagutmon nga natanom na sa garden ning sibyahan.
