BUTUAN CITY – Padayon pang gi-validate sa Philippine Drug Enforcement Agency (PDEA) Caraga ang kinatibuk-ang kantidad sa hybrid marijuana human ang malampusong operasyon kagahapon batuk sa usa ka Filipino-Lebanese nga ilang high value target.
Nakuha gikan sa suspek nga si Simeon Miguel Iswani, residente sa Aglipay St. Cabadbaran City, sa lalawigan sa Agusan del Norte, ang kapin kon kulang 100- gramos sa posh marijuana nga nagkantidad matud pa og P1,800.00 ang kada-gramo.
Sigon ni PDEA-Caraga regional director Aileen Lovitos, dakong operasyon ang ilang gihimo ilabina nga panagsa lang silang maka-apprehend og hybrid marijuana sa rehiyon tungod sa mahal sa presyo niini kumpara sa ordinaryong marijuana.
Kadaghanan matud pa sa mga suki sa suspek, mga langyaw.
Subay sa pag-imbestigar, mitug-an matud pa ang suspetsado nga gikan pa sa Mountain Province ang maong ilegal nga drogang gi-travel lang niya by land hangtod nga nadistribute kini ning rehiyon. (Melody Valledor)
