BUTUAN CITY- Mikunhod ngadto sa USD147.35 bilyon ang outstanding external debt sa Pilipinas sa unang kwarter niining tuiga, gikan sa USD147.65 bilyon sa miaging kwarter, base sa taho sa Bangko Sentral ng Pilipinas (BSP).
Sigon sa BSP, ang maong pagkunhod resulta sa pag-ubos sa gidaghanon sa mga utang nga securities nga gipanag-iya sa mga langyaw, tungod sa mabinantayon nga baroganan sa mga mamumuhunan ug hugot nga kondisyon sa pagpangutang sa mga emerging markets.
Bisan pa niini, nagpabiling lig-on ang mga timailhan sa utang sa nasod, diin ang external debt isip bahin sa gross domestic product (GDP) miuswag ngadto sa 30 porsiyento gikan sa 30.3 porsiyento, samtang misaka usab ang kapasidad sa nasod sa pagtubag sa mga duol nga obligasyon tungod sa igo nga gross international reserves nga USD106.64 bilyon.
Sa laing bahin, nakatala og gamay nga pagsaka ang utang kon itandi sa susamang panahon niadtong 2025, tungod sa bag-ong mga pagpangutang sa gobyerno ug pribadong sektor aron suportahan ang mga prayoridad sa kalamboan, pamatigayon ug kalihokan sa negosyo. Gipaniguro sa BSP nga nagpabiling lig-on ug malungtaron ang debt profile sa Pilipinas taliwala sa mga kausaban sa merkado.
