BUTUAN CITY – Nadakpan na sa kapulisan ang suspetsado sa pagpusil-patay sa iyang maguwang nga lalaki nga kanhi barangay kagawad kagahapon sa alas-2:30 sa hapon sa Purok 11, Brgy. Poblacion, Sta. Josefa, Agusan del Sur.
Naila ang suspetsado nga si alyas Soping samtang igsoon niini nga biktima mao ang 65-anyos nga kanhi kagawad ng si alyas Dodo.
Base sa inisyal nga imbestigasyon sa kapulisan, nakapangayo pa og tabang ang biktimang lalaki kinsa gigukod sa suspetsado ug gipusil sa dughan hinungdan sa iyang kamtayon.
Sa pagresponde sa kapulisan sa crime scene, didto na nakit-an ang asawa sa suspetsado nga si alyas Lily sulod sa iyang kwarto nga patay nang nagbuy-od ug adunay plastik nga cellophane nga nagtabon sa iyang ulo.
Nasayrang daling misibat ang suspetsado sakay sa kolor puti niining sakyanan apan nadakpan ra sa gilusad nga hot-pursuit operation.
Gihikay na ang mga dokumento ug ebidensyang gamiton sa pagpasaka og kaso samtang gisuta pa ang motibo sa kremin.
