BUTUAN CITY- Nagsugod na ang plano aron mabakwit ang liboan ka barko ug kapin 11,000 ka seafarers nga kasamtangang na stranded sa Gulf region human sa hunong-buto tali sa Iran ug Estados Unidos.
Sumala sa International Maritime Organization kon IMO sa United Nations, nakigkoordinar na sila sa mga barkong anaa sa lugar aron sugdan ang luwas nga paglayag pagawas sa Strait of Hormuz.
Gisiguro usab sa IMO, nga ligtas ang himuong evacuation alang sa mga stranded nga barko utg tripulante sa rehiyon.
Gihimo ang halapad nga operation sa pakigtambayayong sa Iran, Oman, Estados Unidos, ug uban pang kumpanya.
Sigon usab sa Ministry of Defense sa Oman, gikatakdang himuon ang evacuation sa usa ka phased o inanay nga pag-rescue aron malikayan ang banggaan sa maong kadagatan.
Sa pagkakaron dili una gamiton ang Traffic Separation Scheme o ang nag-unang shipping route sa Strait of Hormuz. Sa halip, duha ka temporaryong ruta usa sa amihanan ug habagatan sa nasangpit nga agi-anan ang gamiton alang sa luwas nga pagbakwit mga barko.
Ang Traffic Separation Scheme gitakda sa International Maritime Organization niadtong 1968 aron plastaron ang dagan sa mga barkong mo-agi tali sa mga kadagatan sa Iran ug Oman sa Strait of Hormuz.
