BUTUAN CITY – Nabati na sa mga Pinoy ug uban pang mga langyaw nga atua sa Lebanon ang epekto sa giyera sa Middle East tungod sa pagsaka na sa presyo sa mga produktong petrolyo.
Sa eksklusibong pakighinabi sa Bombo Radyo Philippines ngadto kang Bombo international correspondent Karen Bou Ramia Bassil, direkta gikan sa Beirut, gibutyag niining misaka na ngadto sa 150-dolyares ang presyo sa lana.
Gibutyag niini nga bisan og dili pa sila apektado sa giyera apan ila nang nabati ang epekto niini tungod sa pagsaka sa presyo sa mga palaliton sa maong nasud.
Gusto matud pa sa mga negosyante nga makasapi ug tungod sa kalisod sa paghatud sa lana, rason sa paspas nga pagsaka usab sa presyo niini.
Apan bisan pa man, gipaniguro sa Bombo international correspondent to Lebanon nga anaa sila sa maayong kahimtang ug padayon ang ilang pagpakabuhing normal.
