BUTUAN CITY – Nagdasok karon sa Butuan City Police Station 3 ang mga nabiktima sa pagdaro sa usa ka kotse kagabii sa may Brgy. Libertad ning siyudad aron ipatala ang ilang nadangatan ug mangayo og bayad sa nadamyos nilang sakyanan.
Na-ilhan na ang suspek nga si Arnold Cañonero, 38-anyos, minyo, residente sa Emily Homes sa Brgy. Libertad ug nagtudlo sa usa sa mga public schools ning siyudad.
Nanabon pa sa iyang nawong ang suspek dihang gisaysay ang dagan sa panghitabo kondiin iyang gi-angkon nga hubog siya niadtong tungura dungan sa pagsaad nga andam niyang tubagon ang pagpa-ospital sa mga biktima ug bayaran ang nahatag niyang damyos sa mga sakyanan.
Samtang apil sa nagpatala ning buntaga lang sa BCPS-3 ang magti-ayong Russel ug Allan Castro nga taga-Sitio Damayan, Brgy. Libertad aron lang makakuha og bayad sa nadamyos nilang traysikel nga gigamit nilang service aron hakutan sa ilang mga gamit alang sa pagbaligya nila og barbecue.
Saysay sa ginang, nagisi ang iyang agtang sa maong panghitabo apan dili niya kini igsapayan, ma-uli lang ang ilang puhunan ug mapa-ayo ang ialng sakyanan nga mao lama’y gisaligan nila sa ilang inadlaw nga panginabuhian.
Samtang gibutyag usab sa bana niining si Allan nga wala siya’y nadumduman sa maong panghitabo tungod kay nakuyapan dayon siya ug didto na siya nakamatngon og bu-ot sa ospital kondiin sa pagkakaron, iya nang gibati ang pagpanakit sa kalawasan human nabun-og.
