BUTUAN CITY – Padayon karun ang gihimong imbestigasyon aron mailhan og madakpan ang suspetsado nga mipusil sa usa ka drayber sa bao-bao bandang alas 10:30 sa nakalabay nga gabii sa Bus ug Jeepney Terminal sa Km. 4, Barangay Luna, Surigao City.
Nailhan ang biktima nga si Resly Sistona Altizen, 27 anyos, ulitawo, driver ug residente sa Purok 2, Barangay Oslao, San Francisco, Surigao del Norte.
Sa impormasyon gikan sa Surigao Component City Police Station, dunay nakalalis ang biktima nga wala mailhang lalaki sulod sa terminal diin tunga-tunga sa ilang lalis, mibunot sa armas ang suspek ug gipusil ang biktima nga naigo sa ulo.
Tungod sa nahiagum nga samad pinusilan sa ulo, gideklarar nga patay ang biktima sa lugar nga nahitaboan samtang ang suspek daling misibat agi sa sa exit sa terminal.
Nakaresponde usab ang kapulisan nga mihimo og pagproseso sa crime scene samtang naglusad usab og hot pursuit operation batuk sa suspetsado.
Sa karun padayon pang gisuta ang motibo sa krimen ug nagtigum sa dugang mga ebidensya alang sa pagpasaka sa hustong kaso batok sa responsable sa kremin.
Alayon niini , nanawagan ang kapulisan sa mga nakakita sa insidente nga motabang sa imbestigasyon pinaagi sa paghatag nan impormasyon ngadto sa Surigao Component City Police Station.
